الضُرة المجهولة ج 3 حكـايات مني السيد
الجزء الثالث و الاخير
قعدنا في الكافيه ده ليلة كاملة، بنرتب كل فخ، وكل مسمار هندقه في نعش كدبته اللي عاش يبني فيها سنين. نسمة اللي كانت من ساعتين بنت مکسورة بټعيط على حلم الفستان الأبيض، اتحولت لوحش مجروح عايز ينهش. الست لما تكتشف إنها كانت مجرد كوبري بيتداس عليه عشان مصالح راجل، ڠضبها بيبقى أفتك من أي سلاح.
اتفقنا على كل تفصيلة، ونهى بنت خالتي كانت شغالة معانا على التليفون لحد الفجر مع المستشار القانوني لعيلة شريف بيه، والد نسمة. شريف بيه لما عرف الکاړثة، ضغطه عليّ وكان هيجيله جلطة، بس الراجل بخبرة سنين طويلة في السوق فهم إن الانفعال هيضيّع حقه وحق بنته، وقال جملة واحدة في التليفون عمري ما هنساها: «الندل اللي يفكر يسرق بنتي ويستغفلني، هخليه يمشي يكلم نفسه في شوارع القاهرة حافي.»
الخطة اتحطت بالمسطرة، وكان ميعاد التنفيذ تاني يوم الساعة حداشر الصبح في مقر شركة «فيرتكس» في مبنى إداري فخم في التجمع الخامس.
الصبح بدري، أحمد صحي عندي في البيت في زايد، لابس البدلة الكحلي الكاستور، ورابط الكرافتة الشياكة، وواقف قدام المراية بيرش من البرفان الغالي اللي نسمة كانت جايباهوله هدية في عيد ميلاده. كان بيبص لنفسه في المراية بغرور راجل حاسس إنه ملك الدنيا خلاص؛ ضړب ضړبته، لهف فلوس مراته الأولى، وضحك على التانية ورماها، وداخل على التالتة بفلوس وعز عيلتها، وهيفتح شركة تدير ملايين.
قربت منه وأنا ماسكة فنجان القهوة بتاعه، وابتسمت له بنعومة: — «صباح الخير يا حبيبي… شكلك منور ورايق النهاردة.» أحمد عدل لياقة القميص بابتسامة صفرا مغرورة: — «صباح الورد يا داليا. النهاردة عندي اجتماع مجلس إدارة تقيل أوي لتأسيس صندوق استثماري جديد مع مستثمرين كبار. لو البيعة دي تمت، هننقل في حتة تانية خالص.» — «يا رب يا حبيبي… ربنا يديك على قد نيتك، وعلى قد كل قرش دخل بيتنا وخزنته بالظبط.» بصلي باستغراب خفيف: — «دعوتك غريبة شوية، بس يلا، البركة في النوايا برضه. مش عايزة حاجة وأنا راجع؟» — «سلامتك يا أحمد… بس بلاش تتأخر النهاردة، عشان مجهزة لك مفاجأة مش هتنساها طول عمرك.» ضحك ومسح على كتفي بمكر: — «يا ستي كلك مفاجآت. هخلص الاجتماع على الضهر وأكلمك.»
نزل، وأول ما صوت عربيته بعد في الشارع، دخلت لبست بدلة فورمال سودا أنيقة جداً، حطيت روج أحمر صريح، ورفعت شعري لفوق. مكنتش رايحة كزوجة مکسورة ولا ست رايحة تعمل ڤضيحة في الشارع، كنت رايحة كشريك حساب جاي يقفل الدفاتر ويفلّس العميل.
