مؤونة رمضان ج 2 حكـايات مني السيد

لمحة نيوز

نايلون في رجلها عشان المية. ومازن نايم ع السجادة في الريسبشن برجليه المزرقة من الوقفة، مش قادر حتى يرفع راسه يبصلي.
عملتوا إيه يا جماعة؟ ربنا يعينكم.. الأصول برضه غالية وبتتعب.
الحاجة وفاء بصتلي بغيظ مدفون ورا تعب هالك خلصنا.. عبينا متين وسبعين برطمان، وعقمنا الغطيان، ورصيناهم في الكراتين جوة الطرقة.. بس قسماً بالله ما قادرة أصلب طولي، كأني كنت بشيل طوب في طاحونة.
مازن تمتم من ع الأرض بصوت واهن أنا بكره المخلل.. وبكره الطماطم.. وبكره رمضان اللي هيجي وأنا متكسح كده.. اطلبيلي أي مسكن يا وسام، مش قادر أتنفس.
سلامتك يا حبيبي.. ألف سلامة. قوم بس ادخل نام في سريرك، وماما تروح ترتاح في بيتها، وبكرة الصبح فرج ربنا قريب.
ما صدقت حماتي سمعت جملة تروح ترتاح، وقامت اتسندت على الحيطة، واخدة شنطتها وماشية تجر في رجليها جرجرة، وهي بتأكد عليا الكراتين متتلمسش يا وسام.. بكرة العصر هيجي عمك محروس بالتروسيكل بتاعه ياخدهم يوديهم النادي عشان المعرض والتوزيع.. حسك عينك تلعبي فيهم ولا تفتحي برطمان.
من العين دي للعين دي يا ماما.. ده شقاكي وتعبك، ومحدش يقدر ينكر فضلك.
نزلت حماتي بالعافية، ومازن زحف لحد السرير ورمى نفسه بهدومه المزيتة وريحتها خل وشطة، ومفيش دقيقتين وكان بيشخر شخير يسمع الشارع كله. البنج الطبيعي بتاع التعب والمهانة هبطه تماماً.
هنا بقى.. بدأ الشغل الصح.
دخلت المطبخ بهدوء، لبست جوانتي مطاط تقيل، وبدأت أفرز البرطمانات. البرطمانات كانت معمولة كروتة، شغل ناس مجهدة وعايزة تخلص وخلاص، بس كان شكلها من برة يبان مليان ومحكوم. طلعت تليفوني وصورت الكراتين كلها صورة صورة، والعدد بالظبط، وكتبت كشف بالحسبة.
الساعة سبعة الصبح، والجو لسه فيه نسمة برد ومازن غارق في سابع نومة من كتر الإجهاد العضلي، رن جرس تليفوني على الهزاز. نهى تحت، ومعاها العربية النص نقل واتنين رجالة من اللي شغالين معاها في الكيترينج، ومعاهم تروليات نقل كراتين خفيفة ومبتعملش صوت.
نزلت فتحتلهم باب العمارة وباب الشقة بالراحة. خلال عشرين دقيقة بالظبط، كان المطبخ والطرقة ممسوحين على البلاط. متين وسبعين برطمان بكل كراتينهم اتسحبوا واتحملوا على العربية النص نقل، متغطيين بمشمع تقيل، وطاروا على مخزن نهى في الشيخ زايد.
قعدت في الريسبشن، شغلت ماكينة القهوة، وعملت مج قهوة تركي مظبوط، وقعدت حاطة رجل على رجل، ومستنية الباشا يصحى.
الساعة عشرة الصبح، مازن بدأ يتحرك في السرير ويزعق من الشد العضلي. طلع من الأوضة لابس التيشيرت مقلوب وشعره منكوش، وماشي متسند على الحيطان.
صباح الخير يا وسام.. جهزيلي فطار خفيف كده عشان مش قادر، وأمي رنت بتقول هتجيب عم محروس بعد الضهر بدري عشان يلحقوا يودوا الح…
وقف مازن في نص الطرقة متنح.
فرك عينيه، وبص يمين وشمال. الطرقة فاضية.. بتلمع.. ريحة المعطر مغطية على ريحة الخل. دخل المطبخ زي المجنون، بص يمين وشمال، فتح الدواليب، بص تحت الرخامة.. مفيش قشرة لمونة حتى!
طلع يجري في الصالة وهو ماسك دماغه وبيصرخ بهستيريا وسام!! الكراتين فين؟! الخضار فين؟! البرطمانات راحت فين يا وسام؟!
خدت رشفة من القهوة بمنتهى البرود، وبصيتله بابتسامة هادية اتباعت يا حبيبي.
مازن اتسمر مكانه، عروق رقبته نطرت لبرة، ووشه بقى أحمر زي الطماطم اللي كان بيسلقها امبارح اتباعت؟! اتباعت لمين وإزاي ومن غير ما نعرف؟! ده أوردر أمي! ده في تلاتين ألف جنيه دعم، والناس دافعة عربونات، إنتي اتجننتي؟!
جرى إيه يا مازن؟ هو إنت نسيت كلامك ولا إيه؟ مش قولتلي اعمليها عشان البيت وشكلنا قدام الناس ومتبقيش مادية؟ أنا عملت بأصلك.. لقيت تاجر جملة معرفة نهى صاحبتي شال الليلة كلها كاش، وبسعر السوق، من غير فصال.
وفين الفلوس؟! انطقي الفلوس فين؟! صرخ وهو بيقرب مني وعينيه بتطق شرار.
شاورتله على الموبايل اللي محطوط ع الترابيزة الفلوس دخلت حسابي في البنك.. تمن الخامات اللي انتوا جبتوها، وتمن وقفتك وتعبك في المطبخ، ومكسب البرطمانات كلها.. أصل بصراحة كده، حسيت إن البيزنس ده لازم يفضل في البيت، والفلوس دي هتنفعنا لما نيجي نجدد العفش أو.. نشتري المحل اللي في التجمع، مش ده كان طموحك برضه؟
مازن وشه سقط، لونه بهت تماماً، وحس إن في حاجة غلط. الكلمة لمست وتر حساس جداً عنده محل إيه.. وتجمع إيه؟ إنتي بتقولي إيه؟
في اللحظة دي، جرس الباب رن رن متواصل كأن في حريقة. فتحت الباب، ودخلت الحاجة وفاء وهي لابسة عبايتها وخمارها ومعاها الراجل بتاع التروسيكل يلا يا مازن انزل شيل مع عمك محروس، الناس مستنيانا في النادي من الظهرية عشان يفرزوا ويست…
سكتت لما شافت الصالة والمطبخ على البلاط، ومازن واقف ميت في جلده وعينيه مسبلة في الأرض.
إيه ده؟ الحاجة فين؟ الحاجة وفاء سألت بصوت بيترجف من الصدمة.
رديت وأنا قايمة أقف بكل طولي الحاجة في الحفظ والصون يا حماتي.. اتصرفت، وراحت لأصحاب نصيبها الحقيقيين.
الحاجة وفاء سابت شنطتها تقع على الأرض، وصوتها طلع زي الصفارة يعني إيه اتصرفت؟! إنتي اتجننتي يا بت إنتي؟! ده شقايا وتعب ابني! ده أنا واخدة فلوس من الناس وممضية على شيكات وتعهد في الجمعية! إنتي هتوديني في داهية؟ أقسم بالله لأحبسك وأفضحك في عيلتك كلها وأخلي سيرتك على كل لسان!
تفضحي مين يا حاجة وفاء؟
مسكت الريموت بتاع التليفزيون الكبير