فتاه للبيع بقلم إيمان شلبي
” المذيع المجهول”
كان بيصلي في الجامع كعادته واول ما شاف الراجل ده واقف فورا خرج الكاميرا وصوره
فضل اكتر من نص ساعه مراقب الوضع ،كان بيصور رد فعل الناس ،بيصور كل كومنت بيتقال علي الراجل ده صوت وصوره
كان جواه فضول رهيب يعرف ايه اللي يوصل شخص أنه يعمل كده
وفجأه جت في باله فكره وقرر يعملها ،قرب منه وقاله ” انا عايز اتجوز بنتك ”
وفي الحقيقه كل كلمه وكل حركه الراجل عملها اتصورت من ” مهاب ” وهو جواه فرحه عارمه أنه هيحقق الشهره بموضوع لاول مره يظهر علي الشاشه بس ياتري هيقدر يعمل كده ولا في حاجه ممكن توقفه !
وصلوا قدام العماره وركن عربيته ونزل وهو فاتح الكاميرا
كانت عماره بسيطه جدا ،بالكاد تكون متهالكه علي وشك السقوط
اتحرك الراجل وهو اتحرك وراه ،طلعوا دورين ووقف قدام باب الشقه وخبط الباب ومهاب بيصور كل ركن بكل خباثه وحقاره وكأن حياه الناس فيلم للجميع وكأن ذنب الراجل أنه وثق في شخص زيه عايز يحقق الشهره علي حساب حياته وبيته وشرفه
ثواني واتفتح الباب وخرجت بنت قمه في الجمال وكأنها ملاك نازل من السما
وقف لحظات مش قادر يحدد قد اي يتأمل فيها وفي جمالها
قلبه اتحرك وده شيئ جديد لاول مره يحس بيه حس نفسه متوتر ودي مش طبيعته ابدا ده الكل بيقول عليه ثابت مفيش حاجه تقدر تهزه أو حتي شخص يقدر يهزه
تيجي هي وفي خلال ثواني تهزه بالشكل ده!!!
فاق من شروده علي هزه كتفه والراجل بينادي بصوت عالي :
– يابني انت كويس ؟
بلع ريقه بتوتر :
– هه ا اه ا انا بخير
– طب اتفضل يابني
دخل وهو بيبص يمين وشمال يدور عليها أصله مش عارف هي أمتي اختفت بالشكل ده من قدامه وليه ده اول ما شافها كان عايز الوقت يقف عند اللحظه دي كان عايز العالم كله يختفي وميفضلش غيرهم وبس
معقوله في ثواني ممكن الحال يتشقلب بالشكل ده ،معقوله ممكن صدفه تقلب كيان الشخص ،صدفه تخليه يقع في الحب اللي طول العمر بيدور عليه ؟؟
اتنهد ” مهاب ” وهو بيبص للراجل :
– اعرفك بنفسي ياعمي انا…
شاورله بأيده وهو بيقطع كلامه:
– اعرفك انا ليه طلبت عريس يتجوز بنتي الاول وبعدين تعرفني بنفسك
– سامع حضرتك
عيونه اتملت بالدموع وهو بيبص وراه وبيشاور لمهاب أنه يقرب منه فقرب باستغراب
– انا اكتشفت أن عندي كانسر وحالتي متأخره وخايف اسيب البت لوحدها
