شقـة للبـيع ج 2 حكـايات مني السيد

نسيته في الدرج يا رشدي.. تعالى.
قفلت في وشه، وكنت بكذب عليه في حكاية النص بالنص دي، الشقة كلها باسمه، بس كان لازم أهزه، كان لازم أحسسه إن الأرض اللي تحته مش ثابتة زي ما هو متخيل.
مرت نص ساعة زي سنين.
سارة كانت رايحة جاية في الصالة بتعيط وتدعي، وطارق عمال يقلب في الدوسيه ويشوف التواريخ وأسامي المحامين اللي مكتوبين على الإنذار. وأنا كنت قاعدة ساكتة تماماً. الوجع اللي كان في بطني اتحول لجليد، حسيت إني كبرت عشرين سنة فوق عمري في ليلة واحدة، بس في نفس الوقت، كان في غضب بارد بيملا عروقي.. الغضب اللي بيخلي الست متعيطش، وتفكر زي التعلب عشان تحمي حيطانها.
صوت المفتاح في الباب.
الباب اتفتح ببطء، ودخل رشدي. كان باين عليه إنه كان بيجري، وشه عرقان وقميصه مفكوك منه زرارين، وعينيه تايهة بتبص على الكل وبتتفادى تبص في عيني أنا بالذات.
قفل الباب وراه ووقف ساند ضهره عليه.
إيه اللمة دي؟ جايبين طارق يحضر مشاكلنا العائلية يا عفاف؟ للدرجادي مبقاش في ستر في البيت ده؟
سارة انفجرت فيه
ستر إيه يا بابا؟! الستر اللي إنت عريته لما نزلت صور أوضنا وصالتنا على النت للغريب والقريب؟ الستر اللي ضيعته لما رحت ربيت فلوسك في البحر وجاي تدفع تمنها من بيتنا؟
رشدي زعق فيها وهو بيشوح بإيده
اخرسي يا بت! متدخليش بيني وبين أمك، ومترفعيش صوتك عليا، أنا لسه أبوكي!
رشدي! قولت الكلمة دي بصوت واطي بس كان فيه حدة قطعت كلامه في ثانية.
بصلي وهو بيبلع ريقه.
شاورت له على الكرسي اللي قصادي
اقعد.
بص للكرسي وبص لطارق وسارة، وبعدين سحب الكرسي وقعد وهو حاطط إيده على ركبه ورجله بتهز بعصبية.
قولي بقى يا رشدي.. الفلوس راحت فين؟
فرك عينيه بقهر فجأة، وبدأت ملامحه تتكسر، وش الغرور والكبرياء اللي كان لابسه من امبارح بدأ يتقشر، وظهر تحته راجل عجوز مهدود، مضحوك عليه
اتنصب عليا يا عفاف.. اتنصب عليا وخراب بيتي جه على إيديهم.
اتنصب عليك في إيه وإزاي؟
واحد معرفة في الشركة.. قال لي في شركة استيراد بتشغل الفلوس في البضاعة وبتطلع أرباح خيالية. قولت أعمل قرشين للزمن، قولت لما أطلع معاش نبقى مستورين ومنمدش إيدنا للبنات ولا لأزواجهم.. حطيت مكافأة نهاية الخدمة اللي أخدتها مقدم، وبعدين قالوا لي لو زودت المبلغ هنديك نسبة شراكة في الفرع الجديد. روحت البنك وعملت القرض.. قولت كلها ست شهور وهرد القرض كله من الأرباح وأرجع العقد مكانه من غير ما تحسي بحاجة.
وفين الأرباح دي؟ سألته سارة بمرارة.
أول شهرين أخدت الفوايد مظبوطة.. بعد كده الراجل فص ملح وداب، الشركة قفلت ولقيت عليها ميت واحد بيطالبوا بفلوسهم، رفعت قضية، بس القضايا بتاخد سنين، والبنك مبيستناش.. البنك كل شهر بيحسب فوايد وغرامات، لحد ما المبلغ ركب بعضه ووصل للرقم ده.. والإنذار جه، ولو مدفعتش خلال أسبوعين، الشقة هتدخل مزاد علني يا عفاف! هتفضح في المنطقة وعلى كبر هبقى متبهدل في المحاكم!
وعشان متتفضحش إنت.. قولت تبيع الشقة بتراب الفلوس، وترمينا في الشارع؟
مكنتش هرميكي في الشارع! صرخ وهو بيحاول يدافع عن نفسه كنت هاخد شقة إيجار قديم ولا جديد في فيصل ولا في الهرم، ونقعد فيها بالباقي، وكنت هقولك إننا غيرنا عشان البيت واسع علينا!
بتكدب.. بتكدب لحد آخر لحظة يا رشدي.
قومت وقفت وقربت منه، وبصيت في عينيه
إنت مكنتش هتاخدني معاك في أي حتة.. إنت أختي فادية قالتلك إنها متكلمنيش غير لما إنت تفهمني، بس الحقيقة إنك كنت مخطط تخلص البيعة وتاخد القرشين وتسيبني قدام الأمر الواقع. تفتكر أنا عبيطة ومش عارفة المكالمة اللي في البلكونة امبارح كانت مع مين؟ مين اللي كنت بتقوله مش هقدر أوعدك بحاجة دلوقتي؟ ده السمسار؟ ولا المحامي بتاع البنك؟ ولا حد تاني خالص؟
رشدي بصلّي برعب، عينيه وسعت وبدأ يتلفت كأنه محاصر
كان.. كان المحامي بتاع البنك، والله العظيم كان المحامي، بيسألني هسدد امتى عشان يوقف الإجراءات!
طارق اتدخل في اللحظة دي وقال
عمي رشدي، الموضوع دلوقتي ملهوش غير حلين مالهومش تالت. إنت لو بعت بالتوكيل لزبون في السوق من غير ما تسدد البنك، الزبون نفسه هيرفع عليك قضية نصب لما يعرف إن الشقة محجوز عليها، وهتبقى قضية نصب وتبديد مش بس دين مدني.. يعني فيها حبس على طول.
رشدي حط راسه بين إيديه وبدأ يبكي بصوت مسموع، بكا راجل مكسور بس البكا ده مكنش مأثر فيا.. كان واجعني اه، بس مكنش مخليني أتعاطف معاه. اللي يفرط في سقف عياله وكرامتهم عشان طمعه وخيبته، ملوش عندي دموع.
طب والعمل؟ رشدي سأل وهو باصص في الأرض أعمل إيه يا طارق؟ أروح أرمي نفسي في النيل؟ أتحبس على كبر؟
بصيت لطارق وسألته
الحل التاني إيه يا طارق؟
طارق رتب الورق بإيده وقال
الحل التاني يا حماتي، إن البنك مش عايز الشقة، البنك عايز فلوسه. أصل الدين مش ٣٨٠ ألف، أصل الدين في العقد هنا ٢٥٠ ألف، والباقي فوايد وغرامات تأخير. لو حد راح قعد مع الشؤون القانونية في البنك، وعمل تسوية فورية كاش، ممكن ينزلوا الفوايد والغرامات ويوصلوا للمبلغ الأصلي أو زيادة حاجة بسيطة.. يعني ممكن تخلص ب ٢٨٠ أو